بالإضافة لكل ده كمان المهارات التي بيتعلمها الأطفال أثناء تعلم البرمجة بتكون مهارات متعددة الاستخدامات وقابلة للنقل والتطبيق عبر المواقف والوظائف المختلفة، المهارات دي بتتضمن: الإبداع والتفكير النقدي وحل المشكلات والرياضيات، أيضا تعلم البرمجة بيساعد في بناء مهارات شخصية إضافية زي: الصبر والمثابرة والمرونة والتعاون مع الآخرين.

عشان كده مفتاح النجاح والنمو لأطفالك في البرمجة هو إنك تبدأ معاهم الرحلة الممتعة دي من سن مبكرة، وخصوصا إن الأطفال بيكون استقبالهم للمعلومات وقدرتهم على التعلم أثناء اللعب أعلى في سن صغيرة.

وهنا سؤال مهم بيطرح نفسه: أنا كأم أو أب، إيه هو أفضل سن أبدأ فيه أعرف أطفالي وأشجعهم يتعلموا البرمجة؟

الأطفال عندهم القدرة من سن مبكر ٦-٧ سنوات على تعلم البرمجة وممكن كمان يبدأوا التعرف عليها من سن ٥ سنوات ولكن بتكون بصورة مبسطة جدا يقدر عقلهم الصغير يستوعبها ويتعامل معاها.

والأهم من ده كله إن أفضل وقت يبدأ يتعلم فيه الطفل البرمجة لما يظهر اهتمامه بيها ويكون متحمس لتعلمها.

وفيما يلى أهم خمس علامات أو مؤشرات بتبين إن طفلك عنده ميل واستعداد إنه يخوض هذا المجال ويبدأ رحلة تعلم البرمجة:

١. إظهار الاهتمام بألعاب الكمبيوتر وألعاب الفيديو ، وشعوره بالفضول عن كيفية صنعها ورغبته في صنع ألعاب على الكمبيوتر خاصة بيه.

٢. إنه يبدأ يدرك وجود مشكلة ما، وتظهر عنده الرغبة لحلها، وممكن يستخدم لعبة أو تطبيق أو موقع ويب أو تقنية أخرى للمساعدة في حل المشكلة.

٣. إنك تلاحظ على طفلك اهتمامه بالتصميم وبناء الأشياء أثناء اللعب بالليجو والدمى الصغيرة والأشياء المعاد تدويرها … وغيرها.

٤. إن طفلك يبدأ يكون عنده فضول ويسأل أسئلة استكشافية وهو بيلعب، مثلا زي: ايه اللي هيحصل لو كنت حركت القطعة دي من تحت البرج ده، أو زقيت كل العربيات دي ناحية المنحدر ده، أو هيحصل ايه لو قررت أبني بيت تاني لألعابي مثلا..

٥. وآخر مؤشر إن طفلك يكون متميز في الرياضيات و حل المسائل!

شاركنا إيه من المؤشرات أو العلامات دي موجودة عند طفلك؟ .